Jaunpass - Bäderegg - Fängli

Am Samschtig, der 28. Februar 2026, träffe sech wanderfreudigi Ehemalegi vo de Schule Schwand-Bäregg vor der Alpkäserei Jaunpass bi strahlendem Wätter. Katrin Schneiter begrüsst üs u isch erfreut, dass mit 31 Teilnähmer so viu wie no nie are Winterwanderig teilnähme.

Ufem Schneewäg geit es langsam obsi Richtig Bäderegg, wo mir üs gmütlech die nöischte Erläbnis gägesytig erzeue. Nach em Bsestuhne vom Wiudstrubumassiv, de Gastlose u no mänge angere Bärg- u Aupgschichte vo Bekannte lö mir üs bi me Gläsli Wy (La Vache des Alpes), wo d’Auphirte im Schnee vergässe hei, u Gebäck sowie Aupchäs verwöhne. Nach em Gurgle mit stimmpflegendem Eistee u Schnupfe dörfe mir e Jutz vo de «Wiude Schwoschte» (Daniela Schmidiger u Regina Zurflüh) gniesse.

Drufache styge mir gmüetlech zum Auphüttli «Fängli» ab, wo mir es chüstigs Fondue dörfe gniesse u dank gnüegend Tee u Wyssem tüe üser Stimme nid ustrochne. Bim Schnädere hei luschtegi Erläbnis us üser Schuelzyt, Familiegschichte, Erfouge u Witze dä gmüetlech Nami ufglockeret. Zur Abwächslig gä die zwo wiude Schwoschte no zwöi Lieder zum Beschte, was mir gärn mit Applous bedanke.

Na de dreie chöi mir üs glücklech wyder i aui Himmusrichtige ufe Heiwäg wage.

E bsungere Dank giut er Katrin Schneiter, wo dä gmütlech Tag organisiert het, u üsem Kassier Sami Santschi, wo das Fondue us der Vereinskasse beglicht.

Werner Spycher